To Be HaPpY JuSt SmiLe ^_^

مزاجي

..

الجمعة، 16 نوفمبر 2007

الطيبة

Image Hosted by مركز تحميل الحيالة
اليوم بوستي بتكلم فيه شوي عندي كلام ابي اقوله
فيه موضوع في بالي من فتره ابي اتكلم عنه وكنت انتظر الغزال ترووق
:Dوراقت اخيرا
وترى بتكلم بالعاميه تحملوني :)
الطيبة

كانت الطيبه في الماضي ميزة ووسام شرف على اللي يمتاز فيها
بس الحين وبهالايام صارت عيب

هل الطيبة هالايام تخلي الناس يستغلون صاحبها؟
هل نعتبرها ضعف شخصيه ؟

نسمع دايم
((فلان لعبت فيه طيبته الزائده))
هل للطيبه مقياس معين وحدود واضحه لازم مانتعداها؟

او نسمع
((فلان طيب وينضحك عليه))
ليه هي طيبة أو غباء ؟؟

((فلان طيب ومايزعل))
عادي انت زعله واجرحه واستغله لانه طيب مايزعل !!
هل انحكم على الطيبة في زمننا بأنها غباء وضعف شخصية
هذي الصفة الوحيدة اللي صرنا نشوفها في الانسان الطيب ؟
مافي اي مميزات فيه اخذها من طيبته ؟
العيب في الزمن والا في الناس؟

لو جرحك احد او غلط بحقك وفكرت تسامحه تسمع اللي يقولك
((لاتصير طيب بزيادة))
ومع الوقت تلقى نفسك تردد هالكلمة لنفسك
يمكن من كثر الصدمات او الجروح اللي ناخذها من اشخاص قريبين لنا
؟ماعرف :D
بس بالنسبه لي
طيبة القلب شي رائع بس يصيرمصيبة لما يوصل لحد السذاجة والاستغفال
لانها اكيد راح تصير ضدك وتنقلب عليك

وانا اقرى في احد صفحات الشعر في النت لفت انتباهي شعر صغنون بس كلامه غريب
غلطانه أمي يوم على الطيب ربتني
تحسب ناسي مثل ناسها طيبين
قالت سامحي كل من عليك يخطي
الناس تخطي وهم عن القصد ساهيين
مسكينه أمي من غير قصد ظلمتني
ما درت إن الطيب وحده المسكين
هذا يا يمه واقع زماني
نفس إلي يضحك معي اليوم
بكره يطعني بسكين
******************
يجي السؤال المهم
هل نتعامل مع كل الناس بطيبتنا؟
والا لكل مقام مقال
يعني لكل شخص اسلوب في التعامل
هل كل الناس يستاهلون اننا نسامحهم؟ او على حسب الشخص؟

احس اني تكلمت كثير :D
يكفي كذا ان شالله ماكون طولت عليكم وان كلامي يعجبكم :)
Image Hosted by مركز تحميل الحيالة

هناك 18 تعليقًا:

غير معرف يقول...

كثيرون هم الطيبون في هذه الحياة
ولكن صدقيني طيبتهم تختفي سريعاً بسبب استعباط الناس وجرهم لهم
فيقرر فجأة التخلي عن طيبته حتى يستطيع العيش وسط الوحوش

لا أعلم لم يستغل العالم طيبة الشخص ويعتبرونهم أهبل مش طيب

ياقلبي ابتسم يقول...

هلا والله بقطر الندى

يعني العيب من الناس

فعلا مافي احد يبقى طيب مع كل صدمة يقسى ويصير يوسوس ويسيئ النية بكل شي

يعطيك العافيه قطر الندى :)

غير معرف يقول...

اختي ياقلبي ابتسم حينما رأيت نكك
في مدونه مضيعتهم وفي مدونات اخرى فكرت ان ادخلها وحينما دخلتها اصبحت في قائمه المفضله عندي وقرئتها كلها
اعجبتني شخصيتك والتدوينه التي كتبتيها
تمتازين بأسلوب رائع

وفقك الله

اختك صرخة مواطنة

على نفسها جنت براقش يقول...

اكو خط رقيييييق جدابين الطيبه و الغباء لازم تنعامل مع الناس بحرص
و انا اتعامل معاهم على اساس اللى جدامى انسان سئ الى ان يثبت عكس ذلك و مريحه نفسى

ياقلبي ابتسم يقول...

اختي صرخة مواطنه

خجلتيني بجد
ولي الشرف اني اكون في مفضلتك

كلامك كله من ذوقك :)

يعطيك العافيه

براقش :D

يعني الشعره الفاصلة بين الطيبة والغباء هي اللي كثير مايشوفونها وتختط الامور عندهم
انا عكسك اتعامل مع الناس بحسن نيه الني يثبت العكس
حتى لو ماشفت اللي يسرني
بس عالاقل اتعامل مع الناس وانا أنا مو احد ثاني
يعطيك العافيه :)

غير معرف يقول...

شكرا على الموضوع يا قلبي ابتسم
بس يا قلبي الطيبه شي مره حلو بس انا اقولك انا طيبه بس بحدووود يعني لو مافي طيبه في هل الناس مصيبه بس لازم تكون طيبه ما تخفي شخصيتك ولا تمحيك او تكوني لعبه في يد الناس لان الناس يعتقدون ان الطيب مغفل مثل ما قلتي

لو ان الناااس كلها تعلن طيباتها كان عشنا في سلام
بس ربي كرييييم

ياقلبي ابتسم يقول...

حلمي معي
ياليت نعيش بالسلام اللي تقولين عنه :)

يعطيك العافيه

nadeyah يقول...

اول شى مبروك النيو لوك اليديد

وبالنسبه للطيبه ... تدرى الطيب بالزمن هذا ينداس

خلج حذره مع الناس افضل

ياقلبي ابتسم يقول...

الله يبارك بحياتك ياعسل :)

صح الواحد لازم يصير حذر
بس تصير الحياة مملة
زي اللي جالس بغابة وكل شوي يتلفت يمين ويسار خايف احد يهجم عليه

الله يعين

شكرا لك :)

غير معرف يقول...

مرحبا يا قلبي!

صدقج .. ترى كل المصطلحات تغيرت !

كل شيء في هالزمان تغير للأسف ..!

لا سويتي شيء عقيتي على النصيب و لا القدر

و لا صار شيء قلنا حسد

و لا طيبة زايدة ما يستاهلون !

هاي الدنيا : )

ياقلبي ابتسم يقول...

هلا والله دبي

وش نسوي

هذي الدنيا ومجبورين نجاريها :)

يعطيك العافية

Barrak يقول...

الطيبه اصبحت كائن غريب في حياتنا اليوميه

ياقلبي ابتسم يقول...

الله يعين براك هذي الدنيا

حياك :)

غير معرف يقول...

للأسف الطيبه اصبحت نوع من انواع الهباله

و الطيب دايما صار مظلوم

غير معرف يقول...

موضوع حلو عسوله
أحيانا الطيبه وحسن النيه تحرج الشخص الي تتعامل معه
و أحيانا لا
أحيانا الطيبه تـُكسيك الاشخاص الاخرين حولك حتى وان كانت نواياهم الشر
و أحيانا لا
أعتقد لا عيب في الطيبه
و لكن بحذر و ذكاء !

غير معرف يقول...

موضوع جميل ويستحق المشاركه

فعلا هذه الايام الطيب يعتبرونه وسيله جيده للضحك عليه او الكذب عليه

مريت بعد مواقف وطيبتي بصراحه ضيعتني واصبحت من هذاك اليوم حيص جدا في التعامل مع الناس

وانا بصراحه اشوف ان الطيبه شي جميل

ودائما الطيبه يكون محبوب من الناس بس الذي يحصل هذه الايم شي غريب فعلا

الله المستعان

شكرا على الموضوع الجميل

وننتظر جديدك

ياقلبي ابتسم يقول...

محمد للاسف هذا اللي صاير
كل شي بهالدنيا مقلوب

غيوده وحشتيني ياعسل وينك ماتنشافين :)

ان شالله نعرف نتصرف مع كل الناس وماننحط بمواقف محرجه :)

ياقلبي ابتسم يقول...

هلا ابو خليفه :)

الواحد يتعلم من اغلاطه

والا مايفهم الدنيا صح

حياك :)