To Be HaPpY JuSt SmiLe ^_^

مزاجي

..

الخميس، 22 نوفمبر 2007

الف رحمة عليك يالغالي :(


عندما عجزت أن اخفي حزني

وعجزت أن امحوا جراحي

وعجزت عيوني عن ذرف الدموع

لجأت إلى دفتري وقلمي

لأكتب ما عجزت أن أفعله

قد لا تصلكم كلماتي بنفس احساسي

لأنني مع كل حرف اكتبه انزف جرحا جديدا

واستطيع القول انها كلمات خططتها بدمي ودمعي وليس بقلمي

واتمنى ان تصلكم مثلما اردت أن تصل



انتهى العمريا أبوي وسامحني على التقصير

هي كذا الدنيا رحلة مداها قصير

ظلم البيت بغيابك يا عسى ربي يمنع عذابك

عسى المرض كان لذنوبك التكفير

وعسى رضا ربي عنك كبير

وإحنا معنا الله وبحالنا بصير

عسى لا إله إلا الله قولك

عساه في الجنة نزولك

وعسى كل المؤمنين حولك

عسى ربي يغفرلك يا كل من في الوجود

كثرركعات المصلين وكثر السجود

يا عسى يرحمك ربنا المعبود

عساك بالقول تثبت

وبلا إله إلا الله تشهد

عساه النور في قبرك

عسى الله يعوضك صبرك

وعساه دوم زايد ٍ أجرك

يا عسى كل ذنوبك مغفورة

وترى ذكراك في قلوبنا محفورة

وعليك بالصبر يا يمه
وصبرك فيه مأجورة

آه يا يمه سامحيني ما بكيته

آه يايمه اعذريني حتى حقه ما وفيته

كنا نغفل عن غلاته عن حقوقه في حياته

كنا نزعل من كلامه كان يضايقنا ملامه

ما درينا إن هذا خوف

ما حسبنا حساب لها لظروف

كنا نتضايق و نزعل
كنا نبعد وهو يسأل

احس بحرقة في صدري

ولوعة في الضلوع تسري

هو حزن و الا ندم و الا ألم ما ادري

حتى و أنا من أهلي قريبة
أحس إني بينهم مثل الغريبة

آه يا غربة الروح
تعبت من نزف الجروح

مليت من كثر العذاب
مليت من حرق الغياب

مليت من وهم السراب
مليت عيشة الأغراب

مليت من حياتي و دنياي

مليت عيشة الغربة
ما في أحد وياي

توني أفهم معنى كلمة
يا أبوي ما في أحد يسواك

انت عمري انت كلي
وما حدن ياخذ غلاك

اذكر انه مرة قال

بنتي هذي لا تزعلوها

لا تضايقوها ولا تحاسبوها

ان كنتوا ما تدرون هذي

دلــــــــــــوعة أبـــــــــوهـــــــــا

ما حدن يعوض مكانك
لا هو عم ولا هو خال

وما حد يعيش بزمانك
قصر الزمن و الا طال

مرة و إحنا جالسين
وهو يتكلم حزين

(( المنية قربت ليت ربي يبلغني و أشوفك عروس))

ياني تضايقت و زعلت
قلت: يا يبه ليه العبوس

بتزفني بنفسك وبتشوفني عروس

وبتفرح فينا واحد ورى الثاني

ضحك وقال : عسى ربي يحقق هالاماني

ما فهمت إن هذا احساسه بموته

ما انتبهت لنبرة الصدق اللي في صوته

حزني عليه أكبر من كلام ٍ أكتبه

جرحي أعظم من حروف ٍ تحسبه

حتى أبوي ما توفيه هالكلمتين

لأن احساسي بحبه
داخل بصدري دفين

كل اللي أقدر أقوله

إن جرحي أنزفه

بس ما أقدر أطوله

بس لازم نتحدى الظروف

وما نحس بأي خوف

هذي هي أصعــــــب بطوووولة

بس ما ننسى أبونا

والله يعوضنا بأخونا



وسلامتكم


الخاطرة كتبتها بعد ماتوفى الوالد بخمس أيام :(


يعني الحين صار لها سنة ونص تقريبا


كتبتها وماقدرت اراجعها او اعدل فيها كنت ابيها
فضفضه اكثر من انها خاطره موزونة ومنظمة

تعمدت اخليها كذا ولا اغير فيها شي


كانت هي دموعي لاني ماقدرت اصيح وقتها


اتمنى انها تعجبكم :)




الله يرحمك ويغفر لك يا أبوي





هناك 17 تعليقًا:

غير معرف يقول...

الله يرحمه ويجمعكم به في الجنة يااااااااااارب

غير معرف يقول...

الله يرحمه انشاء الله ويغمد روحه الجنه
من جد الخاطرهاثرت فيني وقطعت قلبي :(
الله يصبركم انشاء الله ويعوضكم في اخوكم
وكلنا معاك يالغلا .. مثواه الجنه يارب
وانشاء الله تجتمعون معاه فيها ..

غير معرف يقول...

الله يغفر له و يجمعكم في الجنة ..

إبتسمي ( على إسمك ) .. فسوف يفرح عندما تبتسمين ..
و ادعوا له بالرحمة ..

magnoonah يقول...

الله يرحمه ويغمد روحه الجنه ويعينكم ويعوضكم خير اللهم اميين

كلامج عور قلبي وايد وما الومج هذا شي من الحزن
بصراحه لو بعبر ما اعتقد انه احد بيفهمني الا انج سطرتي الكلام بطريقه بريئه و عفويه

تدرين رغم انه معرفتي بالوالد متاخره وظروفنا تحكم انه نكون بعاد الا اني قدرت اخليه اقرب الناس لي هو صديقي قبل لا يكون ابوي

ودايما لما اشوفه تعبان او حزين اقول بقلبي عسى يومي قبل يومه


ما احب اشوفج حزينه تذكريه باحلى الذكريات وابتسمي لانه عند الرحمن

ياقلبي ابتسم يقول...

تالا

امييييين

جزاك الله خير


الجازي

اميييييييين يارب


تسلميين :)

بندر

امييييين

مبتسمه دايما الحمدلله

وندعي له

يسلمووو



هلا والله مجنونه

امييين يارب

ولايعور قلبك كلامي

انا ماحب الحزن يغلبني

كل ماااتذكره ابتسم

ونصيحه مني

خلك جنب ابوك ولاتهون امك
اقربي منه حييييل استغلي كل لحظه معه

لاني في كل لحظه انشغلت فيها عنه ندمت اني ماعشتها معه حتى لو كانت بظروف

جد تمنيت الزمن يرجع عشان اقابله 24 ساعه ولا اخليه


الله يرحمه يااارب

وجزاكم الله خير :)

غير معرف يقول...

الـ روح /


يا قلبي / عندما تكتظ بي الأحزان
ولا تسعفني لك لدموع ، فلا أملك سوى النظر ..
بحرارة و ألم ..
معلنه إنهزامي أمام ضعفي ..
لـِ فراق أبي ..



الله يرحم أبوي و أبوك ..
ويبلغهم الجنه يااااارب ..
ويجمعنا فيهم بيوم لا ظل إلاظل رب العالمين ..

ياقلبي ابتسم يقول...

هلا والله بالروح ,,, روحي

اميين الله يرحمهم برحمته ويبلغنا الجنه ويااهم ياارب

:)

تسلمين يادوبا

غير معرف يقول...

يا قلبي ابتسم

الله يرحمه انشاء الله ويغمد روحه الجنه


ربي يسعدج ويوفقج

ياقلبي ابتسم يقول...

بو خليفة


يسلمووو على مرورك

وجزاك الله خير :)

May يقول...

الله يرحمه ويدخله الفردوس الأعلى ..

والمسلمين والمسلمات ..

وإن شاء الله ما تشوفين إلاّ أفراح ..

وأبوّك ما مات .. ما دام إنه حيّ جواتكم ...

ميّ

ياقلبي ابتسم يقول...

مي

اميييين

وجزاك الله خير :)

غير معرف يقول...

رحمه الله عليه..

الله يرحمه وفي جنات النعيم منزله

ياقلبي ابتسم يقول...

محمد

امين

جزاك الله خير :)

بـابـل يقول...

مساء الورد عزيزتي

مليون رحمة ونور على الغغالي

والله كلامك يعور القلب وفزز جروح نايمه

عزيزتي هذا درب الجميع يمشونه

خاطرتك طالعه من قلب بنت طيبة وفيه

لذكرى ابوها

تسلمين ياقلبي ابتسم عالكلمات الشفافة


وبس


بابل

ياقلبي ابتسم يقول...

بابل

اشكرك على مرورك

ويسلموو على كلامك الحلو وماقصرت :)

Aldenya يقول...

وانا اقرا

دموعي تنزل لقوة تعبيرج




الله يرحمه ويغمد روحة الجنه
وان شاءالله تجتمعون بالآخرة

غير معرف يقول...

الله يرحمه
ويلهم اهله وذويه الصبر والسلوان خاصه امك شريكة حياته وانتي يالغاليه
بجد تأثرت وماقدرت اواصل قرأتها للاخر
( من حولنا الغاليين بس مشكلتنا مانقدر غلاهم إلا بعد فقدانهم)
وبعدها والله نتمنى ولو ليله بالعمر يرجع ونسمر ونسولف معاهم
(الطرف الغيور)